Í gærkvöldi eldaði ég þessa ljúffengu súpu sem er að mínu mati fullkomin á haustin, ég keypti hakk fyrr um daginn og ætlaði að elda takkó en mig langaði miklu meira í súpu og þess vegna ákvað ég að prófa að nota hakkið í þessa kröftugu „gúllassúpu“. Það kom mjög vel út og súpan varð aðeins léttari fyrir vikið, ég elska gúllassúpur og þessi hér sem er uppskrift frá mömmu minni er í miklu uppáhaldi. Ég studdist við hana þegar ég eldaði þessa súpu í gær og notaði bara það sem ég átti til í ísskápnum, þá má sko aldeilis leika sér með hráefnin í þessari uppskrift – ekkert er heilagt í súpugerð 🙂
Kröftug haustsúpa
- 1 msk olía
- 400 g nautahakk
- 5 sneiðar beikon
- 1 laukur
- 2 hvítlauksrif
- 3 gulrætur
- 1 rauð paprika
- 5 – 6 kartöflur
- 5 – 6 sveppir
- 2 dósir saxaðir tómatar (400 g dósin)
- 1 líter soð (soðið vatn + tveir nautakraftsteningar)
- salt og pipar
- 1 tsk hvítlauksduft
- 1 tsk paprika
Aðferð:
- Hitið olíu í stórum potti, steikið hakkið og smátt skorið beikon þar til beikonið er orðið stökkt. Kryddið hakkið að sjálfsögðu með salti og pipar.
- Skerið lauk, hvítlauk, gulrætur, papriku, kartöflur og sveppi afar smátt og bætið út í pottinn, steikið í smá stund eða þar til grænmetið er orðið mjúkt.
- Kryddið til með þeim kryddum sem eru talin upp hér að ofan.
- Hellið söxuðum tómötum og soðinu út í pottinn og náið upp suðu.
- Leyfið súpunni að malla í 20 – 30 mínútur, ef þið hafið nægan tíma þá er frábært að leyfa súpunni að malla við vægan hita lengur en súpan verður mun bragðmeiri ef hún fær að malla í svolitla stund.
- Berið súpuna fram með sýrðum rjóma og smátt saxaðri steinselju eða klettasalati.
Njótið vel.
Eva Laufey Kjaran Hermannsdóttir
Öll hráefnin í þessa uppskrift fást í verslunum Hagkaups.