Heimilispælingar.

Gleðilegt nýtt ár og takk fyrir það gamla. Ég finn það á mér að þetta verði bloggárið mikla…

Ég var á ansi miklu búðarrápi yfir hátíðarnar eins og flest ykkar býst ég við, á þessum tíma eru allir svo ligeglad og nenna með manni í búðir alla daga. Mikið gaman , mikið stuð.

En í miðju búðarrápinu þegar að ég átti að vera að klára síðustu pakkana – þá fór ég í ímyndunarleik við sjálfan mig.

„Þegar að ég verðstór þá ætla ég að safna þessu stelli.. og á mínu heimili ætla ég að hafa svona borð og stóla“.

Svo var það í einni búð að mamma var að sýna mér hennar stell, vegna þess að mínu mati er það fallegasta stellið af þeim öllum. Hún benti mér á að hún hefði byrjað að safna á mínum aldri, nema hún byrjaði náttúrlega að búa og stofna fjölskyldu þegar að hún var 18 ára þannig að ég er nærri því komin fjórum árum yfir þann aldur sem mamma byrjaði að safna hlutum. Og þá sá ég mér gott til glóðarinnar.. Ég get byrjað að safna núna! T.d. í ár splæsi ég í fjóra matardiska. Og á næsta ári í fjóra kaffibolla og undirskálar… og svo næsta…

Þannig fyrr en varir þá verð ég komin með minn eigin glerskáp af sparistelli og þá get ég sagt, „hjúkket að ég byrjaði að safna svona snemma“. Þetta er pæling.

Þetta árið ætla ég eyða minni pening í óþarfa og meiri í þarfa (hmm, kannski er þetta orð ekki til) t.d. að byrja að safna sparistelli, glösum (er að vísu byrjuð að því) mig langar í fallega hluti inn á heimilið.

Mér finnst ekki annað við hæfi heldur en að ramsa nokkra ansi fína hluti upp fyrir ykkur sem mig langar að eignast árið 2011…. afþví ég á náttúrlega afmæli, fæ sumargjöf frá sjálfri mér og svo koma jólin aftur. Þannig það er allt að gerast.