Lambakórónur með parmesan kartöflumús, rótargrænmeti og bestu rauðvínssósu í heimi

Um helgar finnst mér afar skemmtilegt að elda eitthvað einstaklega gott og þegar ég var að kaupa inn fyrir síðustu helgina kom ég auga á girnilegar lambakórónur í kjötborðinu í Hagkaup sem ég keypti.  Ég ákvað að elda kjötið á lágum hita í eina og hálfa klukkustund , ég var svolítið hrædd um að kjötið væri svolítið þurrt en það var enginn ástæða því kjötið var ótrúlega mjúkt og gott, hreinlega bráðnaði í munni. Meðlætið var alls ekki síðra, ég hafði með kjötinu parmesan kartöflumús, ofnbakað rótargrænmeti og heimsins bestu rauðvínssósu sem Atli vinur minn kenndi mér að búa til. Ég er ekki að plata ykkur þegar ég segi að þetta er trúlega besta rauðvínssósa sem ég hef smakkað – Takk Atli!

Ég mæli innilega með að þið prófið þennan rétt um helgina.

Lambakórónur með parmesan kartöflumús, rótargrænmeti og bestu rauðvínssósu í heimi

Lambakórónur

  • 1,5 kg lambakórónur
  • Salt og pipar
  • Bezt á allt krydd
  • Ólía
  • Smjör
  • Ferskt timían

Aðferð:

  1. Hitið olíu á pönnu, kryddið kjötið með salti, pipar  og bezt á allt kryddið (eða annað gott lambakrydd).
  2. Brúnið kjötið á öllum hliðum, setjið smjör út á pönnuna og hellið duglega á kjötið.
  3. Sjóðið vatn ca. 150 ml og bætið hálfum lambakjötstening saman við.
  4. Setjið kjötið í eldfast mót eða í steypujárnspott sem þolir að fara inn í ofn, hellið lambasoðinu í pottinn og eldið kjötið við 150°C í 90 mínútur. (ég átti til ferskt timían sem ég setti ofan í pottinn)
  5. Leyfið kjötinu að hvíla í lágmark 10 mínútur áður en þið skerið það í bita og berið fram.

Parmesan kartöflumús

  • 800 g bökunarkartöflur
  • 100 g sellerírót
  • 1 dl rjómi
  • 60 g smjör
  • 50 g rifinn parmesan ostur
  • Salt og pipar, magn eftir smekk

Aðferð:

  1. Afhýðið kartöflur og sellerírót, sjóðið í vel söltu vatni þar til hvort tveggja er orðið mjúkt.
  2. Hellið vatninu af og bætið rjómanum, smjörinu, nýrifnum parmesan ostinum saman við og stappið með kartöflustöppu þar til þið náið þeirri áferð sem þið kjósið.
  3. Bragðbætið með salti og pipar.

Rótargrænmeti

  • 4 -5 Regnbogagulrætur
  • 1 sellerírót
  • 1/2 sæt kartafla
  • 6 – 8 sveppir
  • 1 msk smátt söxuð steinselja
  • Salt og pipar
  • Ólífuolía

Aðferð:

  1. Skerið grænmetið smátt og setjið í eldfast mót.
  2. Hellið um það bil matskeið af olíu yfir og kryddið til með salti og pipar, bíðið með að setja smátt saxaða steinselju þar til í lokin.
  3. Bakið við 150°C í 35 mínútur.

Rauðvínssósa

  • Ólífuolía
  • 1 laukur
  • 2 gulrætur
  • 5 sveppir
  • 1 stk anísstjarna
  • 8 piparkorn
  • 4 dl nautasoð
  • 3 dl rauðvín
  • 1/3 dl sojasósa
  • 100 g smjör

Aðferð:

  1. Skerið lauk, sveppi og  gulrætur í litla bita, steikið upp úr olíu í smá stund.
  2. Bætið anísstjörnu, piparkornum, rauðvíni, nautasoði og sojasósu út í pottinn og sjóðið þar til það eru ca. 2 dl eftir og takið soðið af hitanum, sigtið sósuna og bætið því næst smjörinu saman við í nokkrum pörtum.
  3. Berið sósuna strax fram!

Njótið vel.

xxx

Eva Laufey Kjaran Hermannsdóttir

Öll hráefnin í þessa uppskrift fást í verslunum Hagkaups.

Endilega deildu með vinum 🙂

Leave a Reply

Netfang þitt verður ekki birt. Nauðsynlegir reitir eru merktir *